Татарстанда «гаилә атналыгы»нда 600гә якын чара узган

Гаилә, мәхәббәт һәм тугрылык көне гаилә кыйммәтләренең мөһимлеген искәртә, бердәмлекне, гармонияне һәм үзара аңлашуны символлаштыра. Шәһәрнең ЗАГС идарәсе башлыгы Елена Студеникина Казан мэриясендә узган эшлекле дүшәмбедә «гаилә атналыгы» нәтиҗәләре турындагы докладны шундый сүзләр белән башлады.

«Гаилә атналыгы» кысаларында Татарстанда 600гә якын чара (ачык мәйданчыкларда концертлар, мастер-класслар, күргәзмәләр, викториналар, турнирлар һәм конкурслар, кино күрсәтүләр, театраль тамашалар, лекцияләр, спорт чаралары, әдәби кичәләр һәм иҗади остаханәләр) оештырылды», - дип белдерде Студеникина.

Әйтик, 5 июльдә «Елмай» балалар паркында Гаилә бәйрәме узды, анда «Мәхәббәт һәм тугрылык өчен» медале белән бүләкләү төп вакыйга булды. Быел ватандашлары арасында гаилә нигезләренең ныклыгы белән танылган, шулай ук уртак хезмәт белән тәэмин ителгән иминлеккә ирешкән 12 пар әлеге бүләккә лаек булды.

Ватанны саклаучылар елы кысаларындагы чараларга аерым игътибар бирелде. ЗАГС башлыгы сүзләренчә, беренче чиратта, үзләрен армиядә хезмәт итүгә багышлаган гаиләләрне, махсус хәрби операциядә катнашучыларның гаиләләрен, саклану предприятиеләренең хезмәт династияләрен, шулай ук мәгариф һәм мәдәният хезмәткәрләрен котладылар.

Моннан тыш, бу көнне «Шәҗәрә бәйрәме» гаилә фестивалендә гаилә тормышының алтын юбилярларын (барлыгы өч пар) һәм күп балалы өч гаиләне тәбрик иттеләр.