Казанның туристлык порталы барлыкка килде
Туристларга уңайлы булсын өчен Татарстан башкаласында туристлык порталы эшли башлады. Казанның Туризмны үстерү комитеты директоры Дарья Санникова шәһәр мэриясендә узган эшлекле дүшәмбедә шул хакта хәбәр итте. Бу хакта «Татар-информ» хәбәрчесе Арсений Хевронин яза.
«Интерфейсның дизайнына һәм уңайлы булуына аерым игътибар бирдек. Портал шәһәрдәге төп вакыйгалар һәм уңайлы урнашу вариантлары буенча актуаль мәгълүмат бирә», - дип ачыклык кертте докладчы.
Моннан тыш, платформада шәһәрдәге активлыклар турында яңалыклар да урнаштырылачак. Анда шулай ук онлайн-картада визуализация белән тематик маршрутлар бүлеге дә бар. Моннан тыш, шәхси кабинетта үз юл күрсәткеченең функциясе дә яхшылап уйланылган.
Дарья Санникова цифрлы платформаның өч телдә (рус, татар һәм инглиз) эшләвен әйтте. Гомумән алганда, быелның беренче биш аенда Казанга 2,3 миллионнан артык турист килде, дип билгеләп үтте ул.
«Хәзер Казанда туристлар сезонының иң кызган чагы. Кунаклар шәһәр икътисадына сизелерлек йогынты ясый, шәһәр бюджетына саллы өлеш кертә һәм чиктәш тармаклар үсешенә ярдәм итә», – дип искәртте ул.