Лисичанскида Татарстан ярдәме белән Бөек Ватан сугышы ветераны йортын төзекләндерделәр

Лисичанскида Бөек Ватан сугышында катнашкан Лидия Старостина йортында ремонт төгәлләнгән. Эшләр Татарстан Республикасы ярдәмендә «Кеше приюты» проекты катнашында башкарылган.

Ветеранның йортына атышлар вакытында зыян килгән: шартлаудан түбәсе кубкан, түбә япмасына зыян килгән, тәрәзәләре ватылган, коймасы өлешчә җимерелгән. Гаилә мөрәҗәгать иткәннән соң Татарстан белгечләре ашыгыч рәвештә ремонт ясый – түбәне яба, койманы яңарта һәм өй эченә килгән зыянны да бетерә.

Татарстан Премьер-министры Фәнил Әһлиуллин сүзләренчә, ветераннарга ярдәм итү өстенлек булып кала бирә.

«Шеф-төбәк буларак, без ветераннарга булышуны дәвам итәбез, бигрәк тә Ватанны саклаучылар елында. Азат Гайнетдинов һәм аның «Кеше приюты» проекты ярдәмендә Лисичанск шәһәрендә ветераннарга адреслы ярдәм күрсәтүне дәвам итеп булды», – диде ул.

Ветеранның кызы Тамара Нагорняк төзүчеләргә һәм ярдәм өчен республикага рәхмәт әйтте.

«Атышлардан соң йорт яшәү өчен яраксызга әйләнгән иде: түбәсеннән су акты, кышын бик суык булды. Без ярдәм сорап мөрәҗәгать иттек һәм барысын да бик тиз һәм профессиональ дәрәҗәдә эшләделәр. Битараф булмаган өчен һәм безнең кебек гаиләләргә игътибар өчен рәхмәт», – дигән ул.

Татарстан Республикасы шефлыктагы Лисичанск шәһәрендәге ветераннарга адреслы ярдәм күрсәтүне дәвам итә.