Руслан Йосыпов ТР Рәисе вазифасына кандидат буларак теркәлү өчен документлар тапшырды

Бүген, 29 июльдә, республика Рәисе вазифасына кандидат Руслан Йосыпов ТР Үзәк сайлау комиссиясенә теркәлү өчен документларын тапшырды. Аның кандидатурасын Россия Либераль-демократик партиясенең Татарстан төбәк бүлеге тәкъдим итте. Бу хакта ТР Үзәк сайлау комиссиясе матбугат хезмәте хәбәр итә.

ТР Үзәк сайлау комиссиясе рәисе Андрей Кондратьев хәбәр иткәнчә, документлар кабул итү этабы 30 июльдә 18:00 сәгатьтә тәмамланачак. Ул аңлатканча, килгән материаллар эшче төркем тарафыннан тикшерелә, нәтиҗәдә комиссия утырышында тиешле карар кабул ителәчәк.

Татарстанда бердәм тавыш бирү көнендә, 14 сентябрьдә, республика халкы ТР Рәисен һәм 7,5 меңнән артык муниципаль депутатны сайлаячак.

ТР Рәисе вазифасына тәкъдим итү турындагы документларны республика Үзәк сайлау комиссиясенә Рөстәм Миңнеханов («Бердәм Россия»), Руслан Йосыпов (ЛДПР), Хафиз Миргалимов (КПРФ), Виталий Смирнов («Социаль гаделлек өчен Россия пенсионерлар партиясе») тапшырды.