Гөлзар Вәлиева: Сынган аяк белән йөреп булмаган кебек -психик яра белән дә алга бару авыр

«Әгәр кеше тән ягыннан да, психик яктан да сау-сәламәт икән, ул үзенә нәрсә кирәген аңлый, белә һәм үз теләге белән мәхәббәт мөнәсәбәтләреннән баш тарта икән – бу нормаль хәл. Ә инде, мәсәлән, ул тели, тырыша, ләкин берничек тә мөнәсәбәтләргә керә алмый икән – монда инде ниндидер тикшеренүләргә, эзләнүләргә сәбәп бар. Бәлки, үз өстендә эшләргә кирәктер, бәлки, берәр эчке җәрәхәт (травма) бардыр.

Тән җәрәхәте булса, без үзебезне аңлыйбыз. Мәсәлән, аяк сынган икән, без марафонда йөгермибез. Бәлки, миңа Илизаров аппараты куярга кирәктер, бәлки, гипс кую җитәдер. Аяк сынган очракта төрле дәвалау ысуллары бар, төзәлергә миңа 1 көн генә җитмәячәк, кимендә 3 атна кирәк булачак.

Күңел халәте буенча, психика ягыннан берәр «сыну» булса, кеше үзенә «әй» дип кенә карый. Эчке халәт читтән күренми. Сынган аяк белән йөреп булмаган кебек – психик җәрәхәт белән дә алга бару авыр. Әгәр бездә күңелдә җәрәхәт бар икән, ул безгә яхшы мөнәсәбәтләр корырга да, карьера үсешендә дә, иртән үзеңне яхшы хис итәргә дә комачаулый. Хәзер күп кешеләрдә депрессия. Һәр әйбернең сәбәбе бар. Әгәр фундамент ярык икән, нинди генә матур йорт төзесәк тә, ул барыбер җимерелергә мөмкин. Шуңа күрә төпченеп эзләнү кирәк», – ди ул.

«Интертат» газетасы хәбәрчесе Милена Новикова яшьләр арасында сораштыру үткәргән һәм клиник психолог һәм гаилә терапевты Гөлзар Вәлиеваның фикерләрен белешкән.

• Ялгызлар һәм парлылар фикере: «Мәхәббәтсез булмый, тик күпләр яраланудан курка, ышанмый»