Татарстанда бер атнада 27 мең кеше грипп һәм ОРВИ белән авырган
Татарстан Республикасында кискен респиратор вируслы инфекцияләр һәм грипп белән авыручылар саны арту дәвам итә. Кулланучы хокукларын яклау һәм кеше иминлеге өлкәсендә күзәтчелек федераль хезмәте (Роспотребнадзор) мәгълүматлары нигезендә, 2025 елның 22-28 декабрендә ОРВИ һәм грипп белән авыруның 27 352 яңа очрагы теркәлгән. Бу эпидемия бусагасыннан 24,5 процентка югарырак.
Соңгы атнада авырулар структурасында грипп өлеше 80,6 процент тәшкил иткән. Лабораториядә 1 540 очрак расланган. Иң еш очрый торган төр – А (Н3N2) гриппы. COVID-19 белән авыручылар саны узган елның шул ук чоры белән чагыштырганда 38,6 процентка азрак.
Авырулар саны арту барлык яшь төркемнәрендә дә күзәтелә, дип билгеләделәр Роспотребнадзорның ТР буенча идарәсендә.