Пенсияләрне инфляциядән түбән булмаган дәрәҗәдә индексацияләү планы расланды

Россия хакимияте картлык буенча иминият пенсияләрен инфляциядән түбән булмаган дәрәҗәдә индексацияләү принцибын саклап калырга ниятли. Бу хөкүмәт раслаган планнан күренә, дип хәбәр итә «ТАСС».

Әлеге чараның төп максаты – тормыш сыйфатын күтәрү һәм өлкән буынның финанс хәлен ныгыту.

Документта түләүләрне формалаштыру механизмнары аңлатыла. Илдә пенсия белән тәэмин итүнең иң киң таралган төре булган иминият пенсиясе картлык, инвалидлык яки туендыручысын югалту буенча билгеләнә.

Аның күләме ике өлештән – фиксацияләнгән түләүдән һәм тупланган индивидуаль пенсия коэффициентларыннан формалаша. Бер баллның бәясен дәүләт билгели, ә аларның саны турыдан-туры гражданның хезмәт стажына һәм аның рәсми хезмәт хакы дәрәҗәсенә бәйле.

Расланган параметрлар нигезендә, 2026 елның 1 гыйнварыннан иминият пенсияләре инде 7,6% ка арттырылды. Бу күрсәткеч инфляция чыгымнарын компенсацияләүне һәм икътисадта хезмәт хакларының фаразланган үсешен исәпкә алуны берләштерде.

Документта шулай ук пенсияләрне алга таба арттыру тәртибе язылган: индексация ике этапта башкарыла – 1 февральдән һәм 1 апрельдән.

Моннан тыш, эшләүче пенсионерлар өчен түләүләрне яңадан исәпләү механизмы сакланган: ел саен 1 августтан аларның пенсияләре, узган ел өчен эш бирүчеләр тарафыннан исәпләнгән яки түләнгән иминият кертемнәрен исәпкә алып, төзәтеләчәк.