Юрист багаж югалткан өчен авиакомпаниядән компенсацияне ничек алырга кирәклеген аңлатты
Әгәр авиакомпания пассажир багажын югалтса, вакыйгалар үсешенең өч варианты бар: килограммы өчен 600 сумга кадәр фиксацияләнгән түләү, иминиятләштерү һәм, ниһаять, реаль чыгымнарны компенсацияләү. Туризм өлкәсендәге юрист Эдуард Шалоносов «Радио 1» радиоканалына шулай дип белдерде.
«Пассажир югалган багажны эзләү турында гариза язарга тиеш. Кагыйдә буларак, багажны 60 процент очракта тапмыйлар, чөнки аны урлыйлар яки башка илгә җибәрәләр. Боларның барысын да авиакомпания кайтарачак», - дип искәртте белгеч.
Шул ук вакытта, ул иминиятләштерүгә акча кызганмаска киңәш итте. Полисның уртача бәясе 3 мең сум тәшкил итә, бу чемодан бәясеннән күпкә кимрәк.
«Әгәр чемодан табылса, аны пассажирга бушлай илтеп бирергә тиешләр. «Үзегез килегез» дигән таләп – законсыз», - диде эксперт.
Моннан тыш, Шалоносов тагын бер нәрсәгә игътибар юнәлтте: әгәр багаж ял уртасында табылган, ә турист инде беренче чиратта кирәкле әйберләр сатып алган икән, авиакомпания барыбер аларга тотылган чыгымнарны компенсацияләргә тиеш.