Мәгариф министрлыгы сентябрьдән мәктәпләрдә чит телләрне өйрәнүне киметәчәк

РФ Мәгариф министрлыгы яңа уку елыннан укучыларга чит телне өйрәнү өчен бирелгән сәгатьләр санын кыскартырга планлаштыра. Бу хакта Мәскәү педагогика дәүләт университеты (МПГУ) ректоры Алексей Лубков хәбәр итте, дип яза «Труд».

Ул аңлатканча, сүз 5-7 сыйныф укучылары турында бара. «2026 уку елыннан Мәгариф министрлыгы 5-7 сыйныфларда чит тел сәгатьләрен атнага өч сәгатьтән икегә кадәр кыскартырга планлаштыра, ягъни чит телнең гомуми күләме 510 сәгатьтән 408 сәгатькә кадәр кимиячәк», - диде ул.

Ректор сүзләренчә, мондый чара укучыларга йөкләнешне оптимальләштерү һәм вакытны рациональ бүлү өчен кирәк.

8 нче һәм 9 нчы сыйныфларда чит телне укыту күләмен элеккечә калдыру планлаштырыла – атнага өчәр сәгать, дип өстәде Лубков.

Мәгариф министрлыгының урта мәктәптә чит тел уку сәгатьләре санын кыскарту ниятләре турында 2025 елның августында хәбәр ителгән иде инде. Шул ук вакытта министрлыкта чит телләрне өйрәнү мәктәп программасының мәҗбүри компоненты булды һәм булып кала бирә, дип билгеләп үттеләр.