Коммуналь хезмәтләр өчен бурычлыларның нинди очракларда өеннән чыгарыла алуын аңлаттылар

Торак-коммуналь хезмәтләр өчен бурычлар булу өйдән куып чыгару өчен соңгы чара булып тора һәм суд карары буенча гына кулланыла, дип хәбәр итте Дәүләт Думасы депутаты Александр Якубовский.

Ул билгеләп үткәнчә, фатир хуҗасы торак-коммуналь хезмәтләр буенча бурыч өчен өеннән куып чыгарылмый: суд бурычны түләтергә, пенялар исәпләргә, хисаплар яки мөлкәткә арест салырга мөмкин, әмма милек хокукы саклана.

«Бердәнбер искәрмә – әгәр торак бердәнбер булмаса һәм, мәсәлән, инвестиция максатларында кулланылса, тик практикада мондый очраклар бик сирәк», - дип ассызыклады парламентарий RT белән әңгәмәдә.

Ә менә торакта социаль найм килешүе буенча яшәүчеләр белән вазгыять башкача. Депутат аңлатканча, әгәр бурыч күләме җитди сәбәпләрсез алты айдан артык түләнмәсә, суд торактан чыгару карарын кабул итәргә мөмкин, шул ук вакытта бурычлыга санитария нормаларына туры килә торган кечерәк мәйданлы башка торак урын бирелергә тиеш.

«Шул ук вакытта суд һәрвакытта вазгыятьне тикшерә: балигъ булмаган балалар булу, инвалидлык, каты авыру, эш югалту», – дип билгеләп үтте Якубовский.