Хоккей легендалары һәм сугышчан хәрәкәтләр ветераннары Казанда хәйрия гала-матчы уйнаячак
22 февральдә Казанның Спорт сараенда Ватанны саклаучылар көненә багышланган «Татарстан Геройлары» хәйрия гала-матчы узачак. Бу хакта ТР Спорт министрлыгының матбугат хезмәте хәбәр итә.
Бозда «ТР хоккее легендалары» һәм «Хәрби тугандашлык» командалары очрашачак, алар составына хәрби хезмәткәрләр һәм хәрби хәрәкәтләр ветераннары керәчәк. Уен 20 минутлык ике период форматында узачак.
Тамашачылар хоккей формасында республиканың танылган спортчылары Данис Зарипов, Алексей Чупин, Артем Лукоянов, Михаил Глухов һәм башкаларны күрә алачак. Матч башланыр алдыннан кунаклар өчен бәйрәм программасы әзерләнә. Ул Татарстан Республикасы камера хоры катнашында тантаналы ачылыш, концерт, шулай ук аниматорлар һәм аквагрим белән балалар зонасын үз эченә алачак. Моннан тыш, мәйданчыкта кыр кухнясы эшләячәк һәм бүләкләр уйнатылачак.
Татарстан спорт министры урынбасары Илдар Садриев хәрбиләр, сугыш хәрәкәтләре ветераннары һәм махсус хәрби операциядә катнашучылар белән эшләгәндә спортка карата кызыксыну күзәтелүен билгеләп үтте. Аның сүзләренчә, физик активлык, командалы эш һәм спорт белән мавыгу фронттан кайтканнарга тормыш ямен тоярга ярдәм итә.
Ул ассызыклаганча, «Татарстан Геройлары» гала-матчы «Россия спорты» дәүләт программасы кысаларында уздырыла, аның төп бурычларының берсе хәрби хәрәкәтләр ветераннарын реабилитацияләү. Республиканың спорт министрлыгы мондый алымны хуплый һәм мөмкин кадәр күбрәк Ватанны саклаучыларны спорт хәрәкәтенә җәлеп итәргә омтыла.
Фото: © ТР Спорт министрлыгы матбугат хезмәте