«Аулак өй – көрәш» проектында җиңүче командалар «ТатАрчаҖәй» лагерендә ял итә алачак

«Аулак өй – көрәш» төбәкара проектына биш ел. Проект җитәкчесе Сәрия Закирова «Татар-информ»га шул уңайдан яңалыклар турында сөйләде.

Иртәгә «78 нче катнаш төрдәге татар телендә тәрбия һәм белем бирү балалар бакчасы»нда һәм 13 февральдә «384 нче катнаш төрдәге балалар бакчасы»нда «Аулак өй – көрәш» төбәкара проектының сайлап алу турлары була. Әдәби бәйгеләрнең темасы: Габдулла Тукай тормышы һәм иҗаты.

«Саба муниципаль районы мәгариф идарәсе район күләмендә 20 мәктәп арасында сайлап алу туры уздырып, 20 февральдә Байлар Сабасы мәктәбе базасында ярымфинал уздыра. Сайлап алу туры өчен Саба мәгариф идарәсе махсус нигезләмә язган. Ярымфиналда җиңгән команда 24-25 февральдә планлаштырылган «Аулак өй-көрәш» төбәкара проектының финал ярышларына чакырылып кала», – диде ул.

Шулай ук 20 февральдә Саба муниципаль районында 10.00 сәгатьтән 12.30 сәгатькә кадәр мәктәпкәчә белем учреждениеләре арасында «Нәниләр өчен» әдәби бәйге 3 номерлы «Шоколад» балалар бакчасында планлаштырылган. «Нәниләр өчен аулак өй-көрәш бәйгесендә алты балалар бакчасы көч сынаша. Җиңүче балалар бакчасы май аенда «Роберт Миңнуллин исемендәге балалар китапханәсе»нә финал ярышларына чакыру алачак», – диде проект җитәкчесе.

«Аулак өй – көрәш»нең зур яңалыклары бар: Татарстан Мәгариф һәм фән министрлыгы финалда җиңүче командаларга «ТатАрчаҖәй» лагерына юлламалар бүләк итәчәк», – диде Сәрия Закирова.

• Халкыбызның йолаларын, гореф-гадәтләрен өйрәнү, татар әдәбияты классикларын уку максаты белән оешкан «Аулак өй – көрәш» төбәкара проекты Россиянең Мәдәният һәм Мәгариф министрлыклары, Татарстанның Мәгариф һәм фән, Мәдәният, Яшьләр эшләре министрлыклары, Татарстанның мәдәният ресурс үзәге, Бөтендөнья татар конгрессы, «Татмедиа» акционерлык җәмгыяте, «Сәләт» яшьләр үзәге, Татарстан Фәннәр Академиясе ярдәме белән гамәлгә куела.