Башкортстанда «Әлифба» мультсериалының икенче сезонын тәмамладылар
Башкортстанда «Әлифба: вакыт һәм саннар» анимацион белем бирү-күңел ачу проектының икенче сезонын эшләп бетерделәр.
Икенче сезон кечкенә тамашачыларны саннар белән, аннары вакыт төшенчәләре белән, аннары ел фасыллары белән һәм, ниһаять, елның һәр ае белән аерым таныштыра. Бу хакта «Башинформ» хәбәр итә.
Киностудиянең матбугат хезмәтендә аңлатуларынча, проект 3-7 яшькә кадәрге балаларга башкорт теле нигезләрен үзләштерергә ярдәм итә. Мультфильм балаларны туган телгә өйрәтүче ата-аналар өчен, шулай ук балалар бакчаларында һәм мәктәпкәчә белем бирү учреждениеләрендә күрсәтү өчен булдырылды.
Ул 60 серияне үз эченә ала, аларның һәркайсын «саннар» һәм «вакыт» темалары буенча бер сүзгә багышладылар. Һәр чыгарылышны сценаристлар һәм рәссамнардан тыш, балалар психологлары, музыкантлар һәм башкорт теле укытучылары эшләде.
«Әлифба» проектының беренче сезоны башкорт әлифбасы хәрефләре турында иде.