Россия һәм Кытай БМО советыннан Иранга һөҗүмнәр буенча ашыгыч утырыш уздыруны сорады
Берләшкән Милләтләр Оешмасы Куркынычсызлык советының АКШ һәм Израильнең Иран территориясенә һөҗүмнәре белән бәйле ашыгыч утырышы шимбә көнне җирле вакыт буенча 16:00 сәгатькә (Мәскәү вакыты буенча 00:00) планлаштырылган. Бу хакта, ТАСС мәгълүматы буенча, журналистларга Россиянең БМО каршындагы даими вәкиллегендә хәбәр иткәннәр.
Дипмиссиядә ассызыклауларынча, Россия Федерациясе һәм Кытай АКШ һәм Израиль тарафыннан Иран Ислам Республикасына каршы кораллы агрессия акты кылыну белән бәйле рәвештә ашыгыч рәвештә утырыш уздыруны сорады. Инициативага шулай ук Франция, Бахрейн һәм Колумбия дә кушылды.
Белдерүдә билгеләп үтелгәнчә, Вашингтон һәм Көнбатыш Иерусалим гамәлләре халыкара хокук нормаларын турыдан-туры бозудан гыйбарәт һәм Якын көнчыгыш төбәгендә тынычлыкны һәм тотрыклылыкны җимерүгә юнәлдерелгән. Россия БМО секретариаты җитәкчелегеннән булган хәлгә объектив бәя бирүне көтә.