Татарстанның «Хәрби туганлык» оешмасы җитәкчесе итеп Вениамин Чубаренко билгеләнде
Казанда ТР ДОСААФ офисы базасында «Хәрби туганлык» бөтенроссия ветераннар оешмасының Татарстан Республикасы бүлеге конференциясе узды. Җыелышта катнашучылар бүлекнең элеккеге җитәкчесе – запастагы генерал-майор Иван Стогниевның тәкъдиме белән республика оешмасы башлыгы итеп хәрби хәрәкәтләр ветераны, Эчке эшләр министрлыгының элеккеге хезмәткәре һәм Төньяк Кавказдагы операцияләр катнашучысы Вениамин Чубаренконы сайлады.
«Хәрби туганлык»ның республика бүлегенең яңа советы составына оешманың Татарстан муниципаль берәмлекләрендәге бүлекләренең гамәлдәге җитәкчеләре керде.
Өстәмә рәвештә советка күпьеллык стажы булган әгъзалар сайланды: ТР җәмәгать эшлеклеләре берлеге президиумы рәисе, Россия хәрби сәнгать берлегенең ТР буенча башкарма комитеты җитәкчесе, ТР «Беренчеләр хәрәкәте» төбәк советы әгъзасы Александр Даренков, Татарстан «Хәрби туганлык» оешмасының волонтерлар ротасы җитәкчесе Руслан Гайфетдинов, Әфганстандагы сугыш ветераны, запастагы подполковник, Йосыпов исемендәге мәчетнең имам-хатыйбы Тимур хәзрәт Ибраһимов һәм башкалар.
Оешма советы карары белән аның яңа рәисе итеп Иван Стогниев билгеләнде.
Чара азагында Александр Даренков Иван Стогниевка I дәрәҗә «Җәмгыять алдындагы казанышлары өчен» медален тапшырды.