Татарстанда беренче «Ялкын» мәктәп медиа фестивале старт алды
Казан, Мөслим, Нурлат, Әгерҗе, Менделеевск һәм Арчадагы мәктәп медиаүзәкләре беренче «Ялкын» патриотик фестиваленә гаризалар тапшырган. Презентацияләрне кабул итү февральдә башланды. Фестиваль өч этапта узачак: 15 мартка кадәр гаризалар кабул ителә, аннары март дәвамында эшләрне бәялиләр һәм финалистлар исемлеген төзиләр. Йомгаклау этабы 2026 елның апрелендә узачак.
Финалга чыгучыларны белем бирү һәм иҗат сессияләре, медиапроектларны яклау һәм тәкъдим итү, шулай ук бүләкләү тантанасы көтә. Программаның аерым блогы яшьләрне хокукка каршы эшчәнлеккә җәлеп итүне профилактикалауга багышланачак.
«Татмедиа» Республика матбугат һәм массакүләм коммуникацияләр агентлыгы җитәкчесе Айдар Сәлимгәрәев хәбәр иткәнчә, фестиваль мәктәп укучыларын медиа чарасына җәлеп итү эшенең яңа юнәлеше булачак. Аның сүзләренчә, оештыручылар мәктәп медиаүзәкләренең бүген ничек эшләвен бәяләргә ниятли, ә әйдәп баручы журналистлар алар өчен укыту сессияләре үткәрәчәк.
Ул ассызыклаганча, шул рәвешле яшүсмерләр өчен куркынычсыз медиа киңлек булдыру һәм аларны кирәкле һәм файдалы контент булдырырга өйрәтү планлаштырыла.
Катнашуга мәктәп медиа командалары – газета-журналлар редакцияләре, радио- һәм телестудияләр, SMM-командалар һәм республиканың гомуми белем бирү учреждениеләреннән башка форматлар чакырыла. Команда составында 12 дән 18 яшькә кадәрге кимендә өч кеше булырга тиеш.
Татарстанның Яшьләр эшләре буенча министры Азат Кадыров хәбәр иткәнчә, мәктәп медиаүзәкләренең беренче фестивален «Алтын каләм» республика яшьләр һәм яшүсмерләр матбугаты фестивале белән интеграцияләү планлаштырыла. Аның сүзләренчә, хәзер ике чараның форматын үзара тулыландыра торган итү турында фикер алышалар.
Җиңүчеләрне ике төп номинациядә билгеләячәкләр: «Рус телендә мәктәп медиасы» һәм «Татар телендә мәктәп медиасы». Жюри шулай ук индивидуаль номинацияләрдә иң яхшыларны сайлап алачак, алар арасында «Иң яхшы радиопроект», «Иң яхшы видеорепортаж», «Иң яхшы медиа дизайны» һәм башкалар.
Гран-при иясе «Беренче Патриот» иҗтимагый оешмасы оештыра торган «Тур для СВОих» белән Россия төбәкләренең берсенә бару мөмкинлеге алачак.
Фестивальне оештыру «Яшьләр һәм балалар» илкүләм проекты максатларына туры килә.