Чернышов җомгада хатын-кызлар өчен эш көнен ике сәгатькә кыскартырга тәкъдим итте
Дәүләт Думасы вице-спикеры Борис Чернышов Россия хезмәт һәм социаль яклау министры Антон Котяковка, уртача хезмәт хакын саклап, җомга көннәрендә хатын-кызлар өчен эш көнен ике сәгатькә кыскарту тәкъдиме белән хат юллады. Бу хакта ТАСС агентлыгы хәбәр итә.
Парламентарий мөрәҗәгатендә шундый норма кертү мөмкинлеген карарга тәкъдим итте. Аның фикеренчә, ул бюджет өлкәсе учреждениеләре, шулай ук дәүләт һәм муниципаль хезмәткәрләр өчен мәҗбүри булырга тиеш. Шәхси компанияләргә әлеге практиканы рекомендация рәвешендә кулланырга тәкъдим ителә.
Чернышов Хезмәт һәм социаль яклау министрлыгы мәгълүматларын китерде. Аннан күренгәнчә, хатын-кызлар ил икътисадында эшләүчеләрнең яртысын диярлек тәшкил итә. Россия хатын-кызлары атнасына уртача 37,2 сәгать эшли, бу 2022 елга караганда 27 минутка күбрәк. Шул ук вакытта, ир-атларда бу күрсәткеч дүрт минутка гына арткан.
Парламентарий шулай ук билгеләп үткәнчә, Росстат тикшеренүләре буенча, хатын-кызлар өй эшләренә һәм туганнарын карауга көн саен уртача 235 минут сарыф итә. Алты яшькә кадәр бала тәрбияләүче хатын-кызлар арасында бу күрсәткеч эш көннәрендә - 360 минутка, ял көннәрендә 392 минутка җитә.
Вице-спикер сүзләренчә, хатын-кызлар һәм ир-атлар икътисадка бертигез дәрәҗәдә өлеш кертүгә карамастан, өйдәге бурычлар тигез бүленмәгән. Бу, аның фикеренчә, тулы канлы ялга вакыт җитмәүгә китерә, хатын-кызларга физик һәм психологик йөкләнешне арттыра. Чернышов кыскартылган җомга аларга гаиләләре белән күбрәк вакыт үткәрергә мөмкинлек бирәчәк, дип саный.