Татарстанда «Ватанны саклаучылар» фонды 4 мең хәрби ветеранга ярдәм алырга булышкан
«Ватанны саклаучылар» дәүләт фондының Татарстандагы филиалы 2025 елда махсус хәрби операциядә катнашкан дүрт мең ветеранга медицина ярдәме алырга ярдәм иткән. Сүз дәвалау турында да, тернәкләндерү программалары турында да бара. Бу хакта фондның матбугат хезмәте хәбәр итә.
Фонд рәисе Анна Цивилева сүзләренчә, эшнең беренче көннәреннән үк оешма медицина һәм психологик ярдәмгә басым ясый.
«Партнерлар белән берлектә без яклаучыларыбыз илебезнең теләсә кайсы төбәгендә квалификацияле һәм югары технологияле ярдәм алсын өчен мөмкин булганның барысын да эшлибез. Аларга иң яхшы клиникалар һәм иң яхшы белгечләр, ил медицинасының иң алдынгы технологияләрен куллану мөмкинлеге бирелә», - дип билгеләде ул.
Татарстанда фонд Республика Сәламәтлек саклау министрлыгы белән тыгыз элемтәдә эшли. Махсус хәрби операция ветераннары өчен төп медицина учреждениеләре – Казанда һәм Чаллыда ветераннар өчен госпитальләр, шулай ук Республика клиник хастаханәсе билгеләнгән. Әгәр дә федераль дәрәҗәдә дәвалау таләп ителә икән, пациентларны Россия Сәламәтлек саклау министрлыгының профильле үзәкләренә җибәрәләр.