Казан халкын Җиңү паркына аудиогидлы сәяхәткә чакыралар
Казанның Җиңү паркында 9 Май бәйрәме алдыннан «Җиңү адымнары» дигән аудиогидлы сәяхәт оештырыла. Ул Җиңү стеласы янында башлана һәм мемориаль комплексның төп истәлекле урыннары аша узып, сугышчы-интернационалистларга куелган һәйкәл янында тәмамлана.
Сәяхәт вакытында башкала халкы сугыш елларында Казанда оештырылган хәрби эш тарихы, Татарстан каһарманнары һәм аларның батырлыклары белән таныша ала. Шулай ук чарада Идел буе халыкларының төрле вакытларда Ватанны саклауга керткән өлеше турында мәгълүмат җиткереләчәк.
Мәгълүматны тыңлау өчен парктагы стендларда QR-кодны сканерларга яки аудиогидны кабызырга була.