Америка Эрондаги Ислом инқилоби қўриқчилари Корпусини террорчи гуруҳлар қаторига киритди…
Шу ҳақда Америка президенти Дональд Трамп расман маълум қилган. Айнан у Эрон армиясини террорга ҳомийлик қилаётганликда айблаб, террор ташкилотлари рўйхатига қўшиш ҳақида фармон берди.
— Биз Эронга нисбатан молиявий босим ўтказишда давом этамиз, — деди Трамп. — Эрон тарафи террорга ҳомийлик қиляптими, биз нархларни ошириб қўяверамиз. Шундай қиламизки, Эрон раҳбарлари, халқи биз билан ҳамкорлик қилмагани, шартларимизни адо этмагани учун пушаймонлар ейди.
Бу қарорни АҚШ давлат котиби Майкл Помпео ва президент ёрдамчиси Жон Болтонлар ҳам қўллаб-қувватлади. Аммо Пентагон раҳбарлари Трампнинг бу қалтис қадамидан хавотирда эканини сир тутишмаяпти. Уларнинг фикрича, Эрон армияси террор ташкилоти деб эълон қилиниши ёмон оқибатларга олиб келади. Чунки ҳали дунё тажрибасида хориж давлат армиясини террор ташкилоти деб аташ каби ҳолатлар кузатилмаган. Қолаверса, Эрон тарафи бу воқеадан сўнг ўз ҳудудидаги Америка ҳарбий объектларига сезиларли зиён етказиши эҳтимолдан холи эмас.