Мексикалик эркак ҳали вояга етмаган қизни ўғирлаб қочиб қулликда асраётганди. Аммо…
Яқинда Американинг Огайо штати полициячилари йўл қоидасини бузган ҳайдовчини тўхтатишди. Салонда ҳайдовчидан ташқари қиз бола ҳам бор эди. Аммо иккаласи ҳам инглизча сўзлашни билмаскан. Полициячилар қиз билан қаттиқроқ қизиқиб, дарҳол компьютер ёрдамида шахсини аниқлашди. Қарангки, бу қиз 15 ёшда бўлиб, Нью-Жерси штатида яшаркан. Устига устак бу қиз изсиз йўқолган дея ҳисобланиб, унга нисбатан федерал қидирув эълон қилинибди.
Полиция ходимлари ҳайдовчининг ҳам кимлигини аниқлашди. У 33 ёшли Хуан Карлос Моралес-Педрас бўлиб чиқди. Яна суриштирувлар натижасида шу нарса маълум бўлдики, аслида бу мексикалик эркак Америка қонунларини қўпол тарзда бузгани учун аллақачон депорт қилинган. Лекин орадан қисқа вақт ўтгач, у Америка ичкарисига бекитиқча йўллар билан кириб келиб, Нью-Жерси штатида яшовчи 15 яшар қизни ўғирлаб қочган. Кейинчалик қизнинг номусини булғаган. Шахсий қулига айлантирган. Қўлга тушган куни қизни бошқа бир жойга олиб кетаётган экан.
Қонунбузар ва жиноятчи дарҳол турмага жойлаштирилди. Қизни эса касалхонага ётқизишди. Ҳуқуқни муҳофаза қилиш ташкилотидагиларнинг айтишича, қизнинг ҳаётига ҳозирда ҳеч нарса хавф солмаяпти.