Ўзбекистонда коронавирусга чалинганлар сони 1165 кишига етди
Ўзбекистонда 14 апрель соат 23:00 ҳолатига кўра, коронавирус инфекциясини юқтириб олган фуқаролар сони 1165 нафарга етди. Бу ҳақда Соғлиқни сақлаш вазирлиги хабар берди. Аввалроқ 14 апрель куни соат 15:30 ҳолатига кўра, беморлар сони 1113 нафарга етгани маълум қилинганди. Ўзбекистонда ҳозиргача 99 киши коронавирусдан соғайди, тўрт киши касаллик оқибатида вафот этди. Бундан ташқари, хорижда камида 23 ўзбекистонлик коронавирусга чалинган, уларнинг уч нафари вафот этган. Вафот этганлардан бири Ўзбекистонда хизмат кўрсатган артист, таниқли шашмақом ижрочиси Рустам Самарқандий эди. Ўзбекистонда коронавирус билан касалланганлар сони 13 апрель куни 133 тага кўпайди. Бу янги рекорд. Бундан аввал фақат бир марта — 6 апрелда 115 кишида коронавирус қайд этилганди.