Яна бир қурбон: коронавирусга чалинган самарқандлик бемор вафот этди
2017 йилдан буён доимий гемодиализ муолажасини олиб келган 63 ёшли эркак COVID-19 инфекциясидан вафот этди.
Соғлиқни сақлаш вазирлигихабар беришича, самарқандлик И. шу йилнинг 19 май куни вилоят кўп тармоқли тиббиёт марказига оғир аҳволда ётқизилган. Ўтказилган таҳлиллар натижасида унда "Covid-19" инфекцияси тасдиқланган.
Пахтачи туманида яшовчи 63 ёшли (эркак) ушбу бемор 3 йилдан буён I-гуруҳ ногирони бўлиб, сурункали буйрак етишмовчилиги ва анемия оғир даражаси ташҳиси билан диспансер назоратида турган. 2017 йилдан буён доимий гемодиализ муолажасини олиб келган.
Шу йилнинг 25 май куни беморнинг аҳволи ёмонлашган, бурундан ва ички қон кетиш белгилари пайдо бўлган ва реанимация бўлимига олинган.
Бироқ кўрсатилган реанимацион муолажаларга қарамасдан сунъий нафас олиш аппаратида бўлган бемор ўткир нафас ва юрак қон-томир етишмовчилигидан вафот этган.