Мисрлик олимлар Аменхотеп I нинг ташқи қиёфасини тиклашга муваффақ бўлди. Унинг мумиёси томограф ёрдамида «ечилган»

Фиръавн Аменхотеп I нинг мумиёси ҳозирга қадар, замонавий тадқиқотчилар томонидан, дафн кафанисиз ўрганилмаган саноқли Миср ҳукмдорларидан бирининг жасади бўлиб қолмоқда. Мумиё 1881 йилда Луксордаги Дейр-ал-Бахари сағанасидан топилган ва унинг деярли «идеал» ҳолатда сақланган зиғир чойшаблари ечилмаган. Ҳозирда Аменхотеп I нинг мумиёси Қоҳирадаги Миср музейида сақланмоқда, деб хабар беради Meduza.

Маҳаллий олимлар фиръавн қандай кўринишда бўлганини тасаввур қилиш, ўлими сабаби ва вафоти вақтида соғлиғи қандай бўлганини аниқлаш мақсадида унинг қолдиқларини компьютер томографияси ёрдамида тадқиқ этишга қарор қилган. Шундай қилиб улар дафн вақтидаги бинтлар остини кўришга ва шу орқали биринчи бор мумиёнинг кўринишини яратишга муваффақ бўлган. Тадқиқот натижалари Frontiers in Medicine журналида эълон қилинган.

Олимларнинг аниқлашича, Аменхотеп I вафот этган вақтида 35 ёшда бўлган, бўйи эса 168,5 сантиметрни ташкил этган. Фиръавн ингичка иякли овалсимон юз ва кичкина бурунга эга бўлган. Сақланиб қолган айрим ўрамларга кўра, унинг сочлари жингалак бўлган, чап қулоқ солинчагида тешик бор. Тадқиқотчилар фиръавннинг тишлари тўлиқ сақланиб қолганини қайд этган.

Шунингдек, ўралган чойшаб остидан мунчоқлар билан безатилган металл, тахминларга кўра, олтин камар, 30 та тумор ва тақинчоқ топилган.

Тадқиқот муаллифлари унинг ўлими сабабини аниқлай олмаган. Бироқ улар ўлимдан кейинги жароҳатлар ва реконструкция изларини қайд этган. Тахминларга кўра, XXI сулоланинг фивалик коҳинлари дастлабки сағана талон-торож қилинганидан кейин, Аменхотеп I нинг мумиёсини қайта тиклаган ва дафн этган.