Қум бўронлари Қорақалпоғистонга йилига 42 миллион доллар зарар келтирмоқда
Оролқумдан кўтариладиган қум ва чанг бўронлари Қорақалпоғистонга йилига 44,2 миллион доллар зарар келтирмоқда, бу ялпи ички маҳсулотнинг 2,1 фоизига тенг. Бу ҳақда Жаҳон банки ўз ҳамкорлари билан ўтказган тадқиқотда маълум қилинди.
“Орол денгизининг қуриган тубидаги қум ва чанг бўронларини камайтириш учун Ўзбекистонда ландшафтни қайта тиклашнинг аҳамияти” деб номланган тадқиқотда қайд этилишича, ҳаракатсизлик 20 йил давомида 844 миллион долларлик зарарга сабаб бўлган.
“Симуляция натижалари шуни кўрсатадики, Ўзбекистондаги Оролқум чўлининг қайта тикланиши мумкин бўлган қисмидаги қум ва чанг бўронлари туфайли 207 миллион АҚШ долларига тенг 2,1 миллион тонна тупроқ углерод моддаси йўқотилган”,-дейилади тадқиқотда.
Таҳлилчилар 20 йил давомида, жойдаги фойданинг умумий йўқолиши тахминан 652 миллион АҚШ долларини ташкил қилади, деган хулосага келган.
Собиқ Орол денгизининг сувдан қуриган тубида ҳосил бўлган қум ва чанг бўронлари шамол эрозияси таъсирида, жумладан, аҳоли саломатлигига ва ўсимликларга етказилган зарар миқдори йилига ўртача 11,6 миллион долларни ташкил қилади.