Бухорода икки кун қидирувда бўлган 33 ёшли келиннинг жасади катта каналдан топилди
Бухоро вилояти Қоракўл туманида 33 ёшли келиннинг жасади маҳалла ичидан оқиб ўтувчи катта каналдан топилган. Унинг жасади ғаввослар томонидан олиб чиқилган. Бу ҳақда «Дарё»га тумандаги «Чандиробод» маҳалла фуқаролар йиғини раиси Садриддин Шаропов маълум қилди.
Ҳолатга кўра, тумандаги «Арабхона» маҳалласида С.Р. (1989 йилда туғилган) 8 февраль куни уйидан чиқиб кетиб, қайтиб келмаган. Унинг жасади 11 февраль куни маҳалла ичидан оқиб ўтувчи Ёмон жар катта каналидан вилоят Фавқулодда вазиятлар бошқармаси қутқарув отряди ғаввослари томонидан олиб чиқилган.
Садриддин Шароповнинг билдиришича, С.Р. «Чандиробод» маҳалласида яшовчи фуқаро Ў.М.нинг (1994 йилда туғилган) хонадонига қонуний никоҳсиз келин бўлиб тушган.
«Ў.М. биринчи хотинини ўғирлаб қочган, у билан ҳам ноқонуний яшаган ва жуда қисқа вақт ичида ажралган. Қиз ўғирлаб қочишларнинг ҳали-ҳануз давом этаётгани бизнинг оғриқли нуқтамиз. С.Р. эса Ў.М.нинг иккинчи хотини. Ўтган йилнинг куз фаслида қаршилигимизга ва огоҳлантиришимизга қарамай, Ў.М. маҳалла-кўйсиз ўзидан 5 ёш катта бўлган ва ҳали турмушга чиқмаган қизни иккинчи хотин сифатида уйга олиб келиб, у билан ҳам қонуний никоҳсиз яшаб юрди. Билишимизча, қизнинг отаси ва акаси бу йигит билан унинг турмуш қуришига қарши бўлишган. Бироқ, улар бирга яшаган вақтда эр-хотин ўртасида келишмовчилик ёки жанжал чиққани ҳақида эшитмаганмиз. Ўзаро тинч яшаб келишаётганди. 8 февраль куни аёлнинг йўқолгани маълум бўлди ва ички ишлар органлари томонидан қидирувга берилди. 11 февраль куни эса аёлнинг жасадини ғаввослар олиб чиқди», — дейди Садриддин Шаропов.
Вилоят Фавқулодда вазиятлар бошқармаси матбуот хизмати раҳбари Миржон Файзуллаевнинг сўзига кўра, 11 февраль куни соат 06:48 да қутқарув бўлимига чақирув бўлган. Ёмон жар катта каналининг Бухоро шаҳридан қарийб 90 километр олисдалиги боис, қутқарув гуруҳи тахминан соат 09:15 ларда етиб борган. Жасад 15 дақиқада топилган ва унда турли доғлар мавжуд бўлгани боис, жиноят аломатлари топилиши эҳтимолида суд-тиббий экспертизага топширилган.
Қоракўл туман ҳокимлиги вакили Саломат Комилова марҳуманинг соғлиғида нуқсони борлиги ва шунинг учун ҳалигача турмушга чиқмагани ҳақида эшитганини билдирди.
«Дарё» мухбири марҳума билан ноқонуний яшаб келган турмуш ўртоғи Ў.М. билан телефон орқали суҳбатда бўлди.
«Хотинимнинг соғлиғида ҳеч қандай муаммо йўқ эди. Мен уни яхши кўрардим. 7 февраль куни отасининг уйига олиб бордим. Лекин отаси ҳам, акалари ҳам салбий муносабатда бўлди. Ўшанда аёлим уйга қайтаётиб: ‘Отамнинг уйига бошқа ҳеч қачон қайтмайман. Менинг жойим онамнинг ёнида’, — деди. Аёлимнинг онаси 5 йил илгари вафот этган. Шундан буён у жуда қийналиб келаётгани ҳақида кўп гапирарди. Яқин қариндошлари эса, ҳатто тўйимизга ҳам келишмаганди. Мени ўйлантирадигани — хотинимнинг жасади ярим яланғоч топилган. У чўкишидан олдин кийимларини ечиб қўйган бўлган», — деди Ў.М.
С.Р.нинг ўз жонига ўзи қасд қилгани ёки унга суиқасд қилишгани очиқ қолмоқда.
Вилоят прокуратураси матбуот хизмати раҳбари Анвар Эсанов ҳолат юзасидан Қоракўл туман прокуратураси томонидан терговга қадар текшириш ишлари олиб борилаётганини билдирди.