“Ёшига тўлмаган” иномаркалар учун импорт божи пасайтирилди — Бизга қўшилинг: ???? https://t.me/joinchat/AAAAADwt0NGCRoONT4f1_Q
Президент Шавкат Мирзиёев 21 феврал куни “Автотранспорт воситаларининг ички бозорини ривожлантиришни рағбатлантиришга доир қўшимча чора-тадбирлар тўғрисида” қарор имзолади. Тақдим этилган қарорга асосан, Ўзбекистонга автомобиллар импорт қилишда божхона божлари икки босқичда пасайтирилади. Қарор имзоланган пайтдан эътиборан бож ставкалари 30 фоиздан 15 фоизга туширилди, бироқ автомобил двигалети қувватига боғланган қўшимча коэффициентлар (ҳар бир куб см учун 1,8 доллардан 3 долларгача) ўзгаришсиз қолди. 2023 йил 1 январдан бошлаб, қўшимча коэффициентлар ҳам икки баробарга камайтирилади; шу билан бирга, 15 фоизлик асосий бож ставкаси ўзгармай қолади. Божхона божларининг пасайтирилиши фақат янги (ишлаб чиқарилган санасидан Ўзбекистон божхона чегарасини кесиб ўтган кунгача 1 йилдан ортиқ вақт ўтмаган) автотранспорт воситаларига тааллуқли. Ишлаб чиқарилганига 1 йилдан ошган автомобиллар импорти учун 40 фоизлик божхона божи ва қўшимча коэффициент (ҳар бир куб см учун 3 доллардан) ҳисобланади — бунга қадар бундай тартиб ишлаб чиқарилганига 3 йилдан ошган автомобиллар учун қўлланилар эди. Эслатиб ўтамиз, президент Шавкат Мирзиёев 14 феврал куни автомобилсозлик соҳаси бўйича йиғилиш ўтказиб, унда божларни икки баробарга пасайтириш топшириғини берган эди. “Секин-секин божхона тўловлари нол бўлиши керак. Рақобат бўлиши керак, арзон ва сифатли [автомобиллар бўлиши учун]”, – деди давлат раҳбари.