Россия "Ямал – Европа" қувури орқали газ етказишни тўхтатди
Россия Польша-Германия чегарасидаги Мальнов компрессор санциясидан "Ямал – Европа" қувури орқали газ етказишни тўхтатди. Reuters бу ҳақда Германиянинг Gascade газ транспорт қилувчи ширкатига таянган ҳолда хабар тарқатди.
29 март куни эрталаб Мальнов компрессор станциясидан қувурга 1 миллион 450 минг кВтч/соат газ узатиб турилган. Кейин эса узатилаётган газ ҳажми нолга тушган. Газ етказиб бериш нега тўхтатилгани сабаблари маълум эмас.
Айни пайтда Россия бошқа газ қувурлари, жумладан, “Шимолий оқим-1” орқали Европага газ етказиб беришда давом этмоқда.
Хабарда айтилишича, “Газпром” Польша орқали газ етказиб бериш бўйича узоқ муддатли шартномага эга эмас. Бу йўналишдаги қувурларни “Газпром” муайян бир муддатга ойлик ёки кунлик аукционларда сотиб олади.
Аввалроқ президент Путин ҳукуматга “дўст бўлмаган давлатлардан” газ ҳақини рублда ундириш тўғрисида кўрсатма берган эди. Мазкур рўйхатга Кремль G7 давлатлари -АҚШ, Франция, Британия, Германия, Канада, Италия, Японияни ғам киритган. Мазкур давлатлар газ учун Москвага рублда ҳақ тўлашдан бош тортишларини билдирди.
Кейинроқ бу баёнотга Европа Иттифоқининг барча давлатлари қўшилди. Шундан сўнг Кремль матбуот котиби Дмитрий Песков рублда ҳақ тўламайдиган давлатларга газ етказиб бериш тўхтатилди.