Туркманистон президенти Сердар Бердимуҳамедов ўғли билан Умра зиёратини амалга оширди — Бизга қўшилинг: ???? https://t.me/joinchat/AAAAADwt0NGCRoONT4f1_Q
Фото: «Spa.gov.са» 1 июнь куни Туркманистон президенти Сердар Бердимуҳамедов Умра зиёратини амалга ошириш учун Саудия Арабистонига икки кунлик ташриф билан борди, деб хабар беради «Хроника Туркменистана». Бу Сердар Бердимуҳамедовнинг Туркманистон президенти лавозимига киришганидан буён биринчи хорижий ташрифидир. Уни отаси — Миллий кенгашнинг Халқ маслаҳати раиси Гурбангули Бердимуҳамедов, Мажлис раиси, бош вазир ўринбосарлари ва мамлакат муфтийси кузатиб қолди. Қайд этилишича, Саудия Арабистонига президент билан бирга туркманистонлик кексалар ҳам жўнаб кетган. Жидда аэропортида давлат раҳбарини Макка вилояти губернатори ва Саудия Арабистони қироли маслаҳатчиси Халид ибн Файсал ал-Сауд кутиб олган. Саудиянинг СПА агентлиги эълон қилган фотосуратларга қараганда, Сердар Бердимуҳамедовга сафарда ўғли Керимгули ҳамроҳлик қилган. Туркманистон президенти ва делегация аъзолари масжидга ташриф буюриб, намоз ўқиган, сўнг зиёрат учун зарур бўлган расм-русумларни бажарган. Нашр эслатишича, президентнинг отаси — Гурбангули Бердимуҳамедов 2016 йил майида Умра зиёратини амалга оширган эди (шундан кейин давлат ОАВлари унинг номига «ҳожи» сўзини қўшиб ёзадиган бўлди).