Ўзбекистонда президентлик сайловини ўтказиш бўйича 24 тавсия берилди
Мамлакатга ташриф буюрган халқаро кузатувчилар иштирокида мазкур тавсиялар юзасидан муҳокама олиб борилди.
Хусусан, муҳокама бугун, 16 июнь куни Олий Мажлиснинг Инсон ҳуқуқлари бўйича вакили (омбудсман) Феруза Эшматова ва Оуэн Мерфи бошчилигидаги Европада хавфсизлик ва ҳамкорлик ташкилотининг Демократик институтлар ва инсон ҳуқуқлари бўйича бюроси делегацияси аъзолари билан бўлиб ўтди. Бу ҳақда Омбудсман ахборот хмзмати хабар бермоқда.
Маълум бўилишича, мулоқотда 2021 йилда бўлиб ўтган Ўзбекистон Республикаси Президенти сайловида сайловчиларга яратилган шароитлар ва уларнинг сиёсий ҳуқуқларини таъминлашдаги Омбудсманнинг ўрни борасида ўзаро фикр алмашилган.
Таъкидланишича, ўтган сайловда ногиронлиги бўлган шахсларга овоз беришлари учун зарур қўшимча шароитларни яратиш бўйича Омбудсман ва унинг минтақавий вакиллари томонидан фуқаролик жамияти вакиллари билан ҳамкорликда қатор мониторинглар ўтказилиб, сайлов участкалари аъзоларига тавсиялар берилган.
Суҳбат давомида делегация вакиллари томонидан берилган тавсиялар Ўзбекистондаги сайлов қонунчилиги ва уни ташкил этиш тартибларини халқаро илғор тажрибаларига мослаштиришда муҳим аҳамият касб этиши таъкидланган.
“Ўтган йили Ўзбекистонда Президентлик сайловлари ўтказилгандан сўнг ушбу жараёнларни кузатган Европада хавфсизлик ва ҳамкорлик ташкилотининг Демократик институтлар ва инсон ҳуқуқлари бўйича бюроси ўз ҳисоботини апрель ойида эълон қилди ва унда 24 та тавсия ўрин олган. Булар тавсия, холос. Уни эътиборга олиш ёки олмаслик ҳар бир давлатнинг ўзи ҳал қилади. Бизнинг ҳукумат таклифи асосида Ўзбекистонга ташрифимиз давомида тавсияларимизни биргаликда муҳокама қилиш кўзда тутилган. Бугунга учрашувимиз давомида ҳам ушбу институтнинг фаолияти, унинг сайлов жараёнларидаги иштироки, ҳар бир фуқарога овоз бериш ҳуқуқини таъминлаш бўйича шарт-шароитлар яратиш юзасидан фикр алмашдик. Албатта, биз тавсияларимиз эътиборга олинаётганидан ҳурсандмиз. Биз бундан буён ҳам ҳамкорликни давом эттиришга тайёрмиз”,-деган делегация раҳбари Оуэн Мерфи.