Илмсизлик оғдирган, бағрикенглик қайтарган ҳидоят ҳикояси — Бизга қўшилинг: ???? https://t.me/joinchat/AAAAADwt0NGCRoONT4f1_Q
Ассалому алайкум. Исмим Муҳаммаджон (риёкор бўлиб қолмай деб ўзгартириб айтаман). Мусулмон оилада туғилдим. Лекин ота-онам унчалик динга берилган эмасди. Мен ҳам ўзимни шундай оилада дунёга келганим учунгина мусулмонман деб билардим. Аллоҳ таолодан нимани сўрасам беради деб ўйладим. Намоз ўрганиб, манфаатли нарсаларни сўрай бошладим. Қанча сўрашимга қарамай, бермади (шунақа деб ўйладим). Кечроқ бўлсада англадим-ки, бергани ҳиммат, бермагани ҳикмат экан аслида. Аллоҳга бўлган ишончсизлик пайдо бўла бошлади. Атеист бўлдим. Саволларим кўпайди. Нега Аллоҳ бу дунё синовини олдиндан билса ҳам синов қилаверади? Чунки, Унинг билиши бизни бунга мажбурлаши эмас. Сабримиз ва иймонимиз синалиб даражамиз юксалиши экан, аслида. Нега нажот йўлида бўлса ҳам, мусулмонларни ҳаммаси ҳам бахтли эмас? Чунки, ҳаммаси ҳам амал қилмас, қилганлари эса хотиржам ва мамнун экан. Қуръон кўплаб инсонни майда-чуйда икир-чикирлари ҳақида ва қандай иш қилиш кераклиги ҳақида хабар берса, демак инсонлар томонидан ёзилган бўлиши мумкинми? Йўқ, чунки қиёматгача ўзгармайдиган ҳолатдаги китобда инсоният учун дастурул амал бўла оладиган китобни инсон ёзишга ожизлик қиларкан. Қуръоннинг ўзгармаслиги эса алоҳида ҳақиқат. Айтсам саволларим тугамайди. Мен эса англаганларимни ҳам бирга ёздим. Буларни кўпайтирмай қўя қолдим. Хуллас, атеизм энг тўғри йўл деб билардим. Лекин умрим давомида қилган энг катта хатойим шу эди. Юқоридаги саволларимга ўзимча жавоб бериш учун ақлни ишлатдим. Қарасам шунчаки билимсиз одам ҳам соғлом ақли билан жавоб топиши мумкин бўлган содда саволлар экан. Тушуниб етган нарсам шу бўлдики, бизни Аллоҳнинг зоти ҳақида норасо ақлимизни ишлатишга ҳаққимиз ҳам имкониятимиз ҳам йўқ! Гарчи маҳлуқотлар ичида энг ақллиси бўлсак ҳам! Бир жойда ўқиб қолдим. Нега энди ҳаммамиз ота-онамиздан бизни дунёга келтирганига шубха қилиб қараб, исбот талаб қилмаймиз? Чунки ишонч бор. Биз имтиҳон ҳовлисидамиз! Аллоҳни раҳмати лаънатидан устун, деган гапни тўғри эканлигига ишонч ҳосил қилдим. Инсонлар Аллоҳни унутиб, фитналарни ўзлари бошлайдилар. Кейинчи? Гарчи биз Унинг раҳматига лойиқ бўлмасак ҳам, Аллоҳ таолонинг энг катта неъматларидан бири шу. Ўзига қайтгунимизча Ўзига қайтишга муҳлат беради. Раҳмати ва адолатининг ҳаммасини санаб адоғига етиб бўлмайди. Агар атеист толерант ва холис бўлиб яхшилаб ўйлаб кўрса, ҳақни изласа ва илм олса исломга қайтади, ИнШааАллоҳ! Ҳозирги кундаги минглаб фитналар, гуноҳлар сабабидан Аллоҳ бизни жонимизни олиб қўя қолмаётгани ҳам бир неъмат. Атеистлар эса тушунмасдан туриб ўзини ҳақман деб билади. Улар ўзларини алдайдилар, холос. Виждонан толерант бўлиб ҳақни излайдиган атеистлар исломни қабул қиладилар. Ғайридин олимлардан кўпчилиги Исломни қабул қила бошлагани ҳам маълум. Кўзи кўрлар эса юришибди, атеистларнинг раҳнамоларидан бири Ричард Докинзга ўхшаб «дунёнинг яралишида бир сир бор. Балки ўзга сайёраликлар яратгандир» деб. Атеистларни кўпчилигини дават қилишга ҳаракат қилдим. Лекин улар ҳаттоки атеистик таълимотни ҳам билмаганликлари учун хатосини тан ололмай орқа ўгиришяпти. Улар ўзларини ақллиман деб ҳисоблашади. Лекин баъзиларининг ақли ёш боланикидан ҳам паст. Мен ҳам илгари шундай эдим. Мендаги толерантлик сабаб мен иймонли бўлдим. Ҳозир ёшим 17 да. Алҳамдулиллаҳ, мақсадим умрим давомида пул йиғиб бўлса ҳам жамият учун фойдали шахс бўлиш, масжид барпо этиш, ота-онамни ҳажга жўнатиш, Қуръонни тўлиқ ёд олиш ва ҳоказо… Мусулмон биродарларимга Аллоҳнинг раҳмати бўлсин! Атеистларга эса аввал инсоф кейин иймон берсин! Оламлар Робби Аллоҳга беҳисоб шукрлар бўлсин! Салом билан мусулмон укангиз. Манба: Muslim_Mind/715