Қарши шаҳрининг собиқ ҳокими яна қамоққа олинди — Бизга қўшилинг: ???? https://t.me/joinchat/AAAAADwt0NGCRoONT4f1_Q
Жамшид Фозилов Фото: Facebook Қаршининг собиқ ҳокими Жамшид Фозилов тахминий ҳисоб-китобларга кўра йўқотилган 154 миллиард сўм пулнинг 60 миллиарддан кўпини бир ўзи «егани», шунга қарамай, унга нисбатан қўлланилган қамоқ эҳтиёт чораси бекор қилингани ҳақида хабар берилганди. Вилоят прокуратурасининг маълум қилишича, собиқ раҳбар яна қамоққа олинди. Қарши шаҳри судининг 20 октябрдаги ажримига кўра, Жиноят-процессуал кодекснинг 242-2-моддасига асосан вилоят прокуратураси томонидан собиқ ҳоким Ж.Фозиловга нисбатан киритилган қамоққа олиш тарзидаги илтимоснома рад этилиб, уй қамоғи эҳтиёт чораси қўллаш ҳақидаги ажримига нисбатан шаҳар прокурори томонидан вилоят судининг жиноят ишлари бўйича апелляция инстанциясига апелляция тартибида протест келтирилган. Вилоят судининг жиноят ишлари бўйича апелляция инстанциясининг 22 октябрдаги ажримига асосан, шаҳар судининг собиқ ҳоким Ж.Фозиловга нисбатан киритилган қамоққа олиш тарзидаги илтимоснома рад этилиб, уй қамоғи эҳтиёт чораси қўллаш ҳақидаги ажрими бекор қилиниб, қамоққа олиш тариқасидаги эҳтиёт чорасини қўллаш ҳақидаги илтимоснома қаноатлантирилди. Вилоят прокурори томонидан шаҳар собиқ ҳокими Ж.Фозилов ва бошқаларга нисбатан қўзғатилган жиноят иши алоҳида назоратга олинган бўлиб, тергов натижалари юзасидан маълумот берилади. Аввалроқ Термизнинг собиқ ҳокими ва унинг шериклари давлат ва жамият ҳамда тадбиркорлар манфаатига 35,6 миллиард сўм зарар етказгани, шу сабаб собиқ ҳоким ва масъуллар қамоққа олингани ҳақида хабар берилганди.