Тиббиёт фанлари доктори, профессор Сайдиганиходжа Исмаилов 74 ёшида вафот этди.
С. Исмаилов 1948 йил 14 январда Тошкент шаҳрида туғилган. 1972 йил Москва шаҳридаги Патрис Лумумба номли Ҳалқлар дўстлиги университетини тамомлаган.
Меҳнат фаолиятини Бутуниттифоқ хирургия илмий маркази Тошкент филиали кичик илмий ходими сифатида бошлаб, қатор тизим муассасаларида масъулиятли лавозимларда ишлаган.
Жумладан, Ўлка тиббиёт илмий текшириш институти эндокрин хирургия лабораторияси мудири, Эндокринология илмий текшириш институти директорининг илмий ишлар бўйича ўринбосари ва Эндокринология илмий текшириш институти директори каби лавозимларда самарали фаолият юритган.
Шунингдек, С. Исмаилов 2009-2016 йиллар давомида Республика ихтисослаштирилган эндокринология илмий-амалий тиббиёт марказига раҳбарлик қилган.
Соғлиқни сақлаш вазирлиги бутун фаолиятини тиббиёт соҳасига бахш этган фидойи шифокор, ташкилотчи раҳбар Исмаилов Сайдиганиходжа Ибрагимовичнинг вафоти муносабати билан марҳумнинг оила аъзолари ва яқинларига чуқур таъзия изҳор этади.
Соғлиқни сақлаш вазирлиги