Европа Иттифоқи олий вакили Жозеп Боррел Ўзбекистонга келади — Бизга қўшилинг: ???? https://t.me/joinchat/AAAAADwt0NGCRoONT4f1_Q
Фото: Getty Images 17-18 ноябрь кунлари Самарқанд шаҳрида «Европа Иттифоқи – Марказий Осиё» шаклида вазирлар учрашуви ва «Европа Иттифоқи – Марказий Осиё» ўзаро боғлиқлик: «Барқарор ривожланиш учун глобал дарвозалар» мавзусидаги халқаро конференция бўлиб ўтади. Тадбирларда Марказий Осиё мамлакатлари ташқи ишлар идоралари раҳбарлари, Европа Иттифоқи ташқи ишлар ва хавфсизлик сиёсати бўйича олий вакили Жозеп Боррел, Европа Иттифоқига аъзо давлатлар юқори мартабали расмийлари, халқаро молия институтлари, хусусий сектор, эксперт доиралари, фуқаролик жамияти вакиллари иштирок этадилар. Вазирлар учрашуви доирасида Марказий Осиё мамлакатлари ва Европа Иттифоқи мамлакатлари ўртасида иқтисодиёт, савдо, инвестиция, атроф-муҳит, сув ресурслари, иқлим, замонавий хавф ва таҳдидларга қарши курашиш соҳаларидаги ҳамкорликни янада ривожлантириш масалаларини муҳокама қилиш режалаштирилган. Тадбир доирасида «Европа Иттифоқи-Марказий Осиё» биринчи ёшлар форуми ҳам бўлиб ўтади. Халқаро конференция Европа Иттифоқининг Global Gateway ташаббусига мувофиқ, барқарор ўзаро боғлиқликни рағбатлантириш, яшил ривожланишни қўллаб-қувватлаш ва COVID-19 пандемияси оқибатларини бартараф этиш бўйича келишилган чора-тадбирларни ишлаб чиқиш мақсадида Европа Иттифоқи ва Марказий Осиё мамлакатлари ўртасидаги ҳамкорликни ривожлантиришга қаратилган.