Наманган вилояти ҳокимининг машинаси 5 ёшли болани уриб юборди
Ижтимоий тармоқларда Наманган вилояти ҳокимининг йўловчини уриб кетганлиги ҳақида хабарлар тарқалди.
Вилоят ҳокимлиги ҳодисага аниқлик киритди.
Берилган хабарга кўра, 7 октябрь куни соат 12:50лар чамасида Наманган вилояти ҳокимлиги тасарруфидаги Toyota Land Cruiser русумли автомобили Наманган-Уйчи-Учқўрғон йўлининг 8-километрида бахтсиз ҳодиса туфайли йўлни кесиб ўтаётган 2017 йилда туғилган фуқарони туртиб юборган.
Йўловчини зудлик билан туман тиббиёт бирлашмасига олиб борилган. Тўлиқ тиббий текширув ўтказилган, жиддий шикастланиш аниқланмаган, фақатгина юз соҳасида шилиниш бўлган, тез тиббий ёрдам кўрсатилган.
«Қўшимча даволаниш талаб этилмайди. Ҳозирда йўловчининг аҳволи яхши ва ўзининг уйида одатдаги ҳаётий фаолиятини давом эттирмоқда», — дейилади хабарда.
Эслатиб ўтамиз, йўл транспорт ҳодисаси бўйича барча хужжатлар ИИБ томонидан расмийлаштирилган.
Darakchi.uz