Тошкент аэропортида биринчи «ақлли» автотураргоҳ ишга туширилди — Бизга қўшилинг: ???? https://t.me/joinchat/AAAAADwt0NGCRoONT4f1_Q
Фото: Uzbekistan Airports Тошкент халқаро аэропортининг жўнаб кетиш терминали олдида Ўзбекистонда биринчи бўлиб 333 та автомобилга мўлжалланган тўлиқ автоматлаштирилган автотураргоҳ ишга туширилди. Бу ҳақда Uzbekistan Airports матбуот хизмати хабар бермоқда. - Инсон аралашувисиз ишлайдиган биринчи автотураргоҳ тест режимида ишга туширилди, — дейилади хабарда. Автотураргоҳ тизими автомобилларнинг давлат рақамларини таниб, кириш-чиқиш ва тўловларни қабул қилиш имконини беради. Ҳайдовчиларга тўхташ жойи учун тўловнинг икки йўли таклиф этилади. Автомашина рақамини автоматик идентификациялаш билан тўхташ жойини махсус автотураргоҳ ҳисоблагичи орқали нақд пулда ёки QR код ёрдамида тўлаш мумкин. Буни амалга ошириш учун машина рақамини териш керак ва тўлов миқдори паркометр дисплейида пайдо бўлади. Агар машинанинг рақами автоматик равишда аниқланмаса, киришда тўхташ чиптасини олиб, ўша жойда тўлаш керак бўлади. Айни пайтда барча янги ва эски банкноталар тўловга қабул қилинмоқда, Тўловлар Payme тўлов тизимининг QR-коди ёрдамида ҳам амалга оширилади. Таъкидланишича, яқин вақт ичида бошқа тўлов тизимлари ҳамда Visa, Mastercard, Humo ва Uzcard банк карталари орқали тўловлар пайдо бўлади.