Франция ресторанлар ва fast food ошхоналарида бир марталик идишлардан фойдаланишни тақиқлайди

Франциядаги тезпишар овқатлар тайёрланадиган ошхоналар ва ресторанларда истеъмолчилар учун бир марталик идишлар, стаканлар ва лаганлардан фойдаланишга чек қўйилади, бу эса чиқиндилар кўпайишига қарши курашиш ва қайта ишлашни рағбатлантириш бўйича қабул қилинган қонуннинг кучга кириши туфайли юзага келмоқда.
Овқатланиш жойларда биринчи январдан кучга кириши кутилаётган тартибни амалга тадбиқ қилиш учун ресторанлар бир неча ой аввалроқ тайёргарлик кўра бошлашди.

Франциядаги 30 мингга яқин тезпишар таомлар тайёрланадиган жойларда йилига 6 млрд. донадан ортиқ маҳсулот истеъмолчиларга етказиб берилади. Оқибатда, тахминан 180 минг тонна чиқинди ҳосил бўлади.

Аммо ушбу қонун Европа қоғоз қадоқлаш альянси(EPPA) томонидан танқидга учради. Альянс кўпчилик бир марталик контейнерлар қайта тикланадиган манбалардан тайёрлангани ва Европа иттифоқида уларнинг 82 фоизини қайта ишлаш салоҳияти борлигини рўкач қилмоқда.

Ресторан ходимлари эса мижозлар кўп ҳолларда ўзлари билан тайёр таомларни олиб кетишда ишлатадиган бундай идишларни барибир қайтармаслиги ва ахлатга ташлаб юборишини таъкидлашяпти.

Қонун ижросини таъминловчи гуруҳлар эса ушбу қонун fast food операторлари қаршилигига дуч келишидан хавотирда. Чунки, бошқа идишлар қоғоз ва картондан тайёрланадиган буюмларга қараганда қимматроқ, шунинг учун маҳсулотлар нархининг ошиши кўпчилик эътирозига сабабчи бўлиши мумкин.