ҚИШКИ ТАЪТИЛНИ ТУРКИЯНИНГ УЛУҒВОР ТОҒЛАРИ БАҒРИДАГИ ЧАНҒИ КУРОРТЛАРИДА ЎТКАЗИНГ!
Ёрқин манзаралар, улуғвор тоғлар, янги ва қулай чанғи иншоотлари оилаларни унутилмас саргузаштларга бой саёҳатга таклиф этади.
Картепе ва Улудағ: Мармаранинг «Оқ йўллари»
Бурсадаги Улудағ, Ғарбий Онадўлидаги энг баланд тоғ тизмасидир. Кўп йиллар давомида Туркиянинг энг асосий қишки спорт марказларидан бири бўлган Улудағга автомобиль йўли ёки канатлар орқали бориш мумкин. Тоғ-чанғи курорти узунлиги 1750 метрдан 2543 метргача бўлган тоғ-чанғи йўлаклари, шунингдек, саккизта стул, еттита Т-бар (чанғи лифтлари) ва 13 хил чанғи йўлаклари билан эътиборни тортади. Шунингдек, меҳмонлар чанғи жиҳозларини ижарага олишлари ва тажрибали ўқитувчилардан сабоқ олишлари мумкин. Тоғ этакларида ҳели-чанғи, сноуборд, конькида учиш ва қорда велосипедда учиш учун мос йўлларга эга Улудағ, Истанбулга яқинлиги туфайли айниқса дам олиш кунларида афзал кўриладиган манзиллардан бири саналади.
Ўрмон ёнғоғи, эман ва каштан ўрмонлари билан ўралган Картепе чанғи маркази Истанбулга энг яқин қишки манзилдир. Кожаэлидаги бу табиий мўъжиза марказида тўртта телеферик, учта стул ва битта чанғи лифти мавжуд. Йўлларнинг узунлиги 400 метрдан 3500 метргача, минтақадаги қор қалинлиги эса 80-200 см гача ўзгариб туради.
Паландўкен ва Сариқамиш: Шарқий Туркияда қишки таътилдан завқланиш нуқталари
Туркиянинг шарқида, Эрзурумда жойлашган Паландўкен тоғи, айниқса, тоғ чанғиси ва сноуборд учиш учун завқли нуқталардан биридир. Паландўкен тоғ-чанғи маркази Туркиядаги энг узун трассага эга. Бу минтақа профессионал чанғичилар орасида машҳур бўлиб, қуруқ қор туфайли осон сирпаниш ва қияликларнинг тиклиги билан ажралиб туради. Марказда 8100 чанғичини ташишга мўлжалланган тўққизта механик иншоот мавжуд. Тоғ ёнбағирлари ёритилганлиги сабабли, ташриф буюрувчилар кечқурун ҳам чанғи спортидан баҳраманд бўлишлари мумкин.
Туркиянинг энг шарқий нуқтасида, Карс шаҳрида жойлашган Сарикамиш чанғи маркази ташриф буюрувчиларни 2100-2634 метр баландликдаги ажойиб қишки таътилга таклиф қилади. Иккита механик йўлга эга марказда жами еттита чанғи йўлакчаси мавжуд. Алп тоғлари билан бир хил қор сифатига эга бўлган Сарикамиш чанғи марказининг ўртача қор қалинлиги 1,5 метр. Меҳмонлар Сарикамишда бўлганларида, Туркиянинг қишки бошқа машҳур маскани бўлган Карснинг муз билан қопланган Жилдир кўли, шунингдек, машҳур қадимий шаҳар Ани ва шаҳар марказидаги Болтиқбўйи меъморчилигининг ажойиб намуналарини ҳам кўришлари мумкин.
Онадўлининг Эржиес тоғи
Марказий Онадўлининг энг баланд чўққиси бўлган Эржиес тоғи сеҳрли Кападокия минтақаси яқинидаги Кайсерида жойлашган. Учиш имкониятлари туфайли дунёнинг кўп нуқталаридан осонлик билан етиб бориладиган Эржиес, халқаро стандартларда энг сўнгги технология билан жиҳозланган механик жиҳозлари билан диққатни тортмоқда. Гондоллар деб аталадиган ва объектлар орасидаги транспортни таъминлайдиган канат кабиналари ёпиқ ҳудудда қулай саёҳат тажрибасини таъминлайди. Эржиесда бўлганингизда, сиз эртакнамо қишки Кападокияга ташриф буюришингиз, ғор меҳмонхоналарида қолишингиз ва минтақанинг машҳур ер ости шаҳарларини кашф қилишингиз мумкин.
Овит чанғи курорти: Қора денгизнинг ноёб табиатида қишки таътил
Қора денгиз минтақасининг табиий мўъжизаси бўлган Качкар тоғлари этагида жойлашган Овит чанғи маркази яқинда қишки туризмнинг юраги сифатида пайдо бўлди. Йилнинг олти ойи қор билан қопланган марказга ҳар йили 15-30 метр қор тушади. Денгиз сатҳидан 2640 метр баландликда жойлашган ушбу машҳур қишки манзил чўққиларида ҳам кўплаб турар жойлар мавжуд. Ушбу янги объектларда бўлиш вақтида ташриф буюрувчилар ёввойи табиатни кузатишлари ва қишки машғулотлар билан бир қаторда, спорт билан шуғулланишлари мумкин. Овит, шунингдек, чанғи ёнбағирлари ташқарисида сноуборд ва ҳели-чанғи учиш учун қулай муҳити билан профессионал спортчилар ва саргузаштли қор ихлосмандларининг нигоҳидан четда қолмайди.