«Толибон» ўғриликда айбланган тўрт кишининг қўлини омма олдида кесиб ташлади — Бизга қўшилинг: ???? https://t.me/joinchat/AAAAADwt0NGCRoONT4f1_Q
Фото: Etilatroz «Толибон» Афғонистоннинг Қандаҳор вилоятида тўққиз кишини омма олдида жазолади. Бу ҳақда Hasht-e Subh Daily хабар берди. Оммавий жазолаш «тадбири» Қандаҳор вилояти стадионида ўтказилган. Ўғрилик қилгани учун тўрт кишининг қўли омма олдида кесиб ташланган. Никоҳдан олдинги муносабат ва жиноятларда айбланган яна беш нафар айбланувчи ҳибсга олинган. «Толибон» Фараҳ вилоятида қотилликда айбланган шахсга нисбатан қасос ҳукмини ижро этган. Айни пайтда Афғонистон шимоли-шарқидаги Бадахшон вилоятида толиблар ёш қиз ва йигитни никоҳдан олдин алоқада бўлганликда айблаб қамчилаган. Уларнинг ҳар бири омма олдида 38 дарра урилган. 20 декабрда «Толибон» ҳаракати Афғонистоннинг икки вилоятида 30 кишини, жумладан, аёлларни қамчилаганди. Улар ўғрилик, зино ва гиёҳванд моддалар савдосида айбланиб, 25 дан 39 даррагача урилган. Жазоланганлар орасида 3 нафар аёл ҳам бўлган, маҳаллий амалдорлар ва қабила оқсоқоллари ҳукм ижросини назорат қилган. 14 декабрь куни «Толибон» 20 кишини зино, ўғрилик ва бошқа жиноятларда айблаб, жамоат олдида қамчилаганди. Унда ҳар бир эркак 35 дан 39 мартагача калтакланган ва бу «Толибон» расмийлари, диний уламолар, оқсоқоллар ва маҳаллий аҳоли олдида амалга оширилган. Жазоланганларнинг аксарияти қилган жиноятларига кўра қамоқ жазосига ҳукм қилинган. Маълумот учун, «Толибон» етакчиси жиноятчиларни «шариат қонунлари» асосида жазолашни буюрган.