Тошкентда ўғирлаб кетилган Kia Seltos аварияга учради
Машинасини очиқ қолдириб, дўконга кириб кетган фуқаро қайтиб чиқиб уловини топа олмаган. Машинани маст ҳолдаги эркак олиб қочиб, автоҳалокат содир этган.
Тошкент шаҳрининг Сергели туманида Янги Сергели кўчасидаги бекат олдидан Kia Seltos автомобили ўғирлаб кетилди. Бу ҳақда шаҳар ИИББ матбуот хизмати хабар бермоқда.
Ҳайдовчи автомобилни ўт олдирилган ҳолда, қулфламасдан, дўконга кириб кетган. Ўғри ана шу пайтда машинани ҳайдаб қочган.
Ички ишлар ходимлари бу жиноятда гумон қилиб 1986 йилда туғилган Жавлон исми фуқарони қўлга олди. Aвтомобил эса Янгиҳаёт туманидан топилди.
Фуқаро маст ҳолатда бўлгани, эшиги очиқ ва ўт олган ҳолда турган машинани ҳайдагиси келиб қолганини айтган.
“Айбимга иқрорман, қилган ишимдан пушаймонман”, деган у.
Ҳолат юзасидан жиноят иши қўзғатилиб, гумондор қамоққа олинган.