Ўзбекистон ҳукумати қутлашдан тийилган “Муштум”ни АҚШ элчиси табриклади
АҚШнинг Тошкентдаги элчиси Жонатан Хеник “Муштум” журналини 100 йиллик юбилейи билан табриклаш мақсадида 1 май куни таҳририятга ташриф қилди. Бу ҳақда журналнинг телеграмдаги расмий каналида маълум қилинди.
“Элчи жаноблари элчихона журналга обуна бўлганини, “Муштум”нинг мухлиси эканлигини, унинг ҳар бир сонини мунтазам ўқиб боришини таъкидлаб ўтди. Шунингдек, у ходимлар, иш жараёни, нашрнинг тарихи билан танишди. Журналнинг қутлуғ ёши билан элчихона номидан табриклади ва совғалар топширди”,- дейилади “Муштум” билдирувида.
Журнал бош муҳаррири Носиржон Тошматов АҚШ элчиси таҳририятга кутилмаганда келгани тўғрисида “Газета.uz”га гапириб берган. Муҳаррирга кўра, шу кунгача журнални юз йиллиги билан бирорта ҳукумат мулозими қутлаган эмас.
Хабарда таъкидланишича, Носиржон Тошматов 2022 йилдан буён “Муштум” юбилейини ўтказиш бўйича “бир қанча масъул ташкилотларга хатлар ёзиб, мурожаат қилиб келади. Аммо шу пайтгача журналнинг 100 йиллик тўйи нишонлангани ҳам, бирор амалдор табрик сўзи ёзгани ҳам йўқ”.
“Муштум” журнали 1923 йилда таъсис этилган. У Ўзбекистондаги ягона ҳажвий ва танқидий журнал ҳисобланади. Сўнгги пайтларда у бир неча ойлик танаффуслар билан чоп этила бошлаган эди.