Жиҳодчи Қодир Аднан 86 кунлик очликдан сўнг Исроил қамоғида вафот этди

Исроил қамоқхонасида 86 кунлик очлик акциясидан сўнг «Исломий жиҳод» гуруҳининг юқори мартабали вакилларидан бири Қодир Аднан вафот этди. У террорчиликда айбланаётган эди.

Исроил қамоқхоналар хизмати маҳбус ўз камераси полида хушсиз ҳолда топилганини билдирди. У касалхонанинг жонлантириш бўлимига ётқизилган ва ўша ерда хушига келмай вафот этган. Би-би-си радиосининг хабар беришича, очлик туфайли Аднаннинг соғлиғи ёмонлашган, аммо у тиббий хизматдан воз кечган эди.

Аднан ўлимидан бир неча соат ўтгач, Ғазо минтақасидан Исроилга учта ракета отилди. Ҳужум учун масъулиятни ҳозирча ҳеч ким ўз зиммасига олмади. Исроил армияси тарқатган билдирувда айтилишича, ракеталар сайхонликка келиб тушган ва ҳеч кимга зарар етмаган.

Аднаннинг хотини Ранда Моуса эри шаҳид бўлганини эълон қилди ва унинг ўлими учун қасос олмасликка чақирди. «Бир томчи қон ҳам тўқилмаслиги лозим»,- деди Ранда Моуса.

«Исломий жиҳод» Аднан ўлими учун Исроилдан ўч олинишини билдирди. Фаластин бош вазири Муҳаммад Штайех Исроил ҳукуматини Аднанни махсус ўлдирганликда айблади.

Сўнгги 20 йилда Аднан бир неча маротаба Исроил қамоқхонасида ушлаб турилган эди. У ўзининг қўлга олинишига норозилик сифатида очлик эълон қилган.

Бешинчи ва сўнгги очликни у уч ой олдин қўлга олинганида бошлаган эди. У ўз уйида – Иордан дарёси ғарбий соҳилидаги Арраба шаҳрида ушланган. Унинг иши бўйича суд май ойида бошланиши кутилаётган эди.