Хитой олимлари ўтмишда Марсда океанлар бўлганини исботлашди
Хитойнинг геология фанлари университети (Ухань) тадқиқотчилари Марс сайёрасида қадимда океан бўлганини исботловчи далил топди, деб хабар беради «Синьхуа» агентлиги.
Профессор Сяо Лун раҳбарлигидаги тадқиқотчилар гуруҳи Хитойнинг Марс юзасини тадқиқ қилаётган «Чжужун» аппарати орқали олинган маълумотларни ўрганиб, илк бор Марс юзасида денгиз чўкмалари мавжудлигига петрологик далил топганини исботлади.
Агентликнинг таъкидлашича, тадқиқот давомида қадимда Марсда йирик миқдорда суюқлик бўлгани аниқланган.
Ердан туриб амалга оширилган кузатувлар натижасида бундан 3,7 миллиард йил бурун Қизил сайёра юзасида чуқурлиги 140 метрлик океан сувлари мавжуд бўлгани аниқланган. Айрим олимларнинг фикрича, сувларнинг катта қисми коинотга буғланиб кетмаган, аксинча Марс тупроғининг тагида яшириниб ётган бўлиши мумкин.