Грузия президенти мухолиф телеканал асосчисини афв қилди
Грузия президенти Саломе Зурабишвили 22 июнь куни ўтказилган махсус брифингда “Мтавари Архи” (“Асосий канал”) телекомпанияси асосчиси Николоз Гварамияни афв этгани ҳақида эълон қилди. 23 июнь куни у озодликка чиқди.
“Рустави-2” телекомпанияси маблағларини ўзлаштирганликда айбланган Гварамия ўтган йилнинг май ойида Тбилиси шаҳар суди ҳукми билан 3 йилу 6 ойга озодликдан маҳрум этилганди. Шаҳар суди ҳукмини апелляция суди ҳам, Олий суд ҳам тасдиқлаган.
Гварамия ўзини ҳеч қачон айбдор деб тан олган эмас ва ўзига қарши жиноят ишини “мутлақо сиёсий” эканини айтиб келган. Европа парламенти аъзолари дохил Ғарб мамлакатлари вакиллари ҳамда АҚШ Давлат департаменти медиаменежер ва журналистнинг қамалиши “Европа Иттифоқига интеграция билан мувофиқ келмаслиги”ни бир неча бор урғулашган.
Тбилиси ЕИга аъзоликка номзод мақомига интилмоқда, президентнинг мазкур қарори эса, Грузиядаги кўпчилик экспертлар фикрича, номзодликка эришиш жараёнини енгиллаштириши мумкин.
Аввалроқ Грузияга “Европача истиқболга соҳиб мамлакат” мақоми берилган эди. ЕИ билан янада юқори интеграция даражасига кўтарилиш учун Брюссель теран демократик ислоҳотлар (биринчи галда суд соҳасида) ўтказиш бўйича 12 та шарт қўйган.
Рустави шаҳридаги қамоқхонадан чиққанидан кейин Гварамия Саломе Зурабишвилини собиқ президент Михаил Саакашвили афв қилишга чақирди, дея хабар қилди Озодликнинг “Эхо Кавказа” лойиҳаси. Президент Зурабишвили эса “Саакашвилини афв қилган тақдирда ҳам унга қарши қўзғатилган бошқа жиноят ишлари туфайли қамоқхонада қолаверади” дея бу ишни қилишдан бош тортиб келмоқда.