Ўшда президент томоша қилган кўпкари оммавий тартибсизлик билан якунланди
Мустақиллик куни Ўшда ўтказилган кўпкари мусобақаси оммавий тартибсизлик билан якунланди. Бу ўйинни мустақиллик тантанасини нишонлаш учун Ўшга келган президент Садир Жапаров ҳам томоша қилаётган эди. Тартибсизлик ўйин якунланганидан сўнг содир этилган. Президент бу тартибсизликнинг гувоҳ бўлгани ёки бўлмагани тўғрисида расмий маълумот йўқ.
Кўпакари мусобақаси Ўшнинг “Дўстлик” ва Таласнинг “Интимақ” жамоалари ўртасида ўтказилаётган эди. Бу мусобақада “Интимақ” жамоаси ғалаба қозонган. Томошабинлар ҳакамни нохолисликда айблашган ва ўйин адолатсиз баҳоланганини иддао қилиб, норозилик билдирган. Норозилик оммавий тартибсизликларга айланиб кетган.
Тартибсизликлар натижасида етти киши тан жароҳатлари олгани, улардан бир нафари касалхонага ётқизилгани хабар қилинди. Жароҳат олганлардан бири милиция ходими бўлган. Милиция тартибсизликларда иштирок этганлардан 25 нафари 1 сентябрда сўроққа чақирилганини билдирди. Мазкур ҳодиса юзасидан жиноят иши очилгани тўғрисида ҳозирча маълумот йўқ.
Жорий йилда Мустақиллик кунига бағишланган расмий тантаналар 31 август куни президент Садир Жапаров иштирокида Қирғизистоннинг жанубий пойтахти мақомига эга бўлган Ўш шаҳрида ўтказилди.