Йоханнесбургдаги кўп қаватли уйда чиққан ёнғинда камида 70 киши ҳалок бўлди
Жанубий Африка Республикасининг Йоханнесбург шаҳрида 31 августда беш қаватли уйда чиққан ёнғин оқибатида камида 70 киши ҳалок бўлди. Reuters агентлигининг хабар беришича, ёнғин чиққан уй асосан камбағаллар яшайдиган мавзеда юз берган. Бу ерда минглаб уйсизлар кўчаларда яшашади.
Ёнғин уйнинг ичида бошланган. Шошилинч ёрдам хизматлари бу ерга орадан бир неча соат ўтгач етиб келган. Reuters агентлигига кўра, бу вақтда ўнлаб кишининг жасади кўчада ётган эди.
Шаҳар ҳокимлиги ёнғиндан 12 соат ўтгач ҳам мазкур уйда яшаган одамлар тўғрисида аниқ ва ишончли маълумот бера олмади. Расмийлардан бирининг айтишича, бу уйдаги айрим хоналар жиноий гуруҳларга ижарага берилган.
ЖАР президенти Сирил Рамапоса ёнғин пайтида воқеа жойига келган ва оила аъзолари ҳамда мулкларидан ажралган одамларнинг дод-фарёдига гувоҳ бўлган.
Йоханнесбург мэрига кўра, ёнган уй давлатга қарашли бўлган ва қочқин аёлларга фойдаланиш учун берилган эди. Бироқ кейинроқ уйни ўзаро низолашаётган жиноий гуруҳлар босиб олгани тахмин қилинган.