Ўзбекистонда BYD электромобиллари ишлаб чиқарилади
Ўзбекистон Инвестициялар, саноат ва савдо вазирлиги ҳамда Хитойнинг BYD автомобил ишлаб чиқарувчи компанияси ўртасида “Ўзбекистонда электр ва гибрид автомобиллар ва уларнинг бутловчи қисмларини ишлаб чиқаришни ташкил этиш” инвестиция шартномаси имзоланди.
Унга кўра, BYD Auto ва Ўзавтосаноат АК ҳамкорлигида электромобиллар ҳамда гибрид автомобиллар ишлаб чиқариш бўйича BYD Uzbekistan Factory қўшма корхонаси ташкил этилади. Лойиҳанинг биринчи ва иккинчи босқичларида режалаштирилган ишлаб чиқариш ҳажми йилига 50 минг дона автомобилни ташкил этади, учинчи босқич якунланиши билан эса бу кўрсаткич йилига 300 минг донага етказилади.
Лойиҳа иштирокчиларининг таъкидлашича, BYD Uzbekistan Factory ушбу автоконцернининг Хитойдан ташқаридаги биринчи қўшма корхонасидир. Завод томонидан ишлаб чиқариладиган илк моделлар Chazor (Destroyer 05) седани ва Song Plus кроссовери бўлади.