Тошкентда 14 йил аввал содир этилган қотиллик жинояти очиқланди

Тошкент шаҳрининг Чилонзор туманида 2010 йил содир этилган қотиллик воқеасига аниқлик киритилди. Бугун, 26 январь куни Жиноят ишлари бўйича туман судида ушбу қотилликни содир этган шахсга ҳукм ўқилди. Бу ҳақда судда иштирок этган “Дарё” хабар берди.

Судда аниқлаштирилишича, 2010 йилнинг 17 ноябрь куни Тошкент шаҳрининг Чилонзор туманидаги Алгоритм даҳасида жойлашган хонадонларнинг биридан 34 ёшли аёл жасади топилган. Ҳолат юзасидан туман прокуратураси томонидан ўша йили, ўша куни жиноят иши қўзғатилган бўлса-да, қотиллик содир этган шахс 2023 йилнинг март ойида Россияда қўлга олинди.

^{Фото: “Дарё”}

Судланувчи М.С. 2010 йил сентябрь ойларида Тошкент шаҳрининг Сергели туманида жойлашган автомашиналар бозорида машина олди-сотдиси ва ижарага бериш билан шуғуланувчи Насиба Шодмонова билан танишиб қолган. Уларнинг ўзаро муносабатлари яқинлашиб, кейинчалик улар Чилонзор туманидаги Насиба Шодмоновага тегишли хонадонда бирга яшай бошлаган. М.С. машина сотиб, уни ижарага беришдан даромад топаётган аёлнинг маблағларини ўзлаштириш режасини тузган.

Тузилган жиноий режага кўра, судланувчи 2010 йил 15 ноябрь куни соат тахминан 23:00 ларда бирга яшаб келган таниши Насиба Шодмонованинг 7 минг доллар ва 5 миллион сўм нақд пул маблағларини эгаллаш мақсадида унга ҳужум қилиб, аёлни бўйин қисмидан бўғиб, ўлдирган. Ва танишига тегишли 7 минг доллар (Ўзбекистон Республикаси Марказий банкининг 2010 йил 15 ноябрдаги маълумотномасига кўра 1 АҚШ доллари 1629 сўмни ташкил қилган) ва 5 миллион сўм, жами 16 миллион 403 минг сўм пулини эгаллаб, воқеа жойидан яширинган, — дейди судда сўз олган давлат айбловчиси.

Прокурорнинг аниқлик киритишича, судга оид тиббий экспертизанинг 2010 йил 17 ноябрдаги хулосасига кўра, Насиба Шодмонованинг ўлими бўйин қисмини қаттиқ жисм билан бўғиш оқибатида юзага келган механик асфиксия натижасида юз берган.

^{Фото: “Дарё” / Тергов ҳужжатларидан.}

Давлат айбловчиси қотиллик жиноятини содир этган шахсга муддат сўрар экан, унинг жабрланувчига етказган моддий зарари унинг яқинларига тўлаб берилишини, шунингдек, қотиллик жиноятини содир этиб, нафақат воқеа жойидан, Ўзбекистондан ҳам қочиб кетган айбланувчини чет элдан ушлаб келиш учун қилинган харажатларни ҳам давлат фойдасига ундиришни сўради.

^{Фото: “Дарё”}

Судлов ҳайъати қотиллик жиноятини содир этиб, 13 йил давомида жавобгарликдан қочиб юрган шахсни 17 йилга озодликдан маҳрум қилди. Ҳамда жазони ижро этиш муддатини 2023 йилнинг 22 март кунидан бошланган деб ҳисобланиши ҳақида ҳукм чиқарди. Судланувчига нисбатан Олий Мажлис Сенатининг 2012 йил 5 декабрдаги, 2013 йил 12 декабрдаги, 2014 йил 14 ноябрдаги амнистия тўғрисидаги қарорлари бандлари татбиқ этилиб, жазо муддати тўртдан бирига қисқартирилди.

^{Фото: “Дарё”}

Судланувчидан марҳуманинг қонуний вакили фойдасига 91 миллион 884 минг сўм моддий зарар ундирилиши, шунингдек, судланувчини Россиядан ушлаб келиш учун сарфланган 36 миллион сўм миқдоридаги маблағни давлат фойдасига ундириш белгиланди.