Наманган вилоятининг Косонсой туманида тезкор тадбир баҳонасида банкдан катта миқдорда пул олиб, қочиб кетган собиқ иш бошқарувчи қамоққа олинди. Бу ҳақда Platina хабар берди.
Маълум қилинишича, “Халқ банки” АТБ Косонсой туман филиали иш бошқарувчиси лавозимида ишлаган К.Қ.В. сохта тезкор тадбир учун пул кераклигини айтиб, ўз ишхонасидан катта миқдордаги пулларни олиб чиқиб кетган.
У 2023 йил 9 августда ишдан олинган, аммо филиал бош ҳисобчиси ва касса мудири билан олдиндан тил бириктириб, 17 август куни касса омборига биргаликда кирган. Улар гўёки департаментнинг Косонсой тумани бўлими ходимлари томонидан тезкор тадбир ўтказилаётганини, тадбирда фойдаланиш учун пул кераклигини айтган.
Шу тариқа касса омборидан 137 минг АҚШ доллари ва 1,2 миллиард сўм пулни чиқим ордери расмийлаштирган ҳолда қўлга киритиб, пул маблағларидан ҳеч қандай тадбирда фойдаланмасдан, ишониб топширилган ёки уларнинг ихтиёрида бўлган ўзганинг мулкини ўзлаштириш ва растрата қилиш йўли билан талон-торож қилган.
Жиноят ишлари бўйича Косонсой тумани судининг 2023 йил 18 августдаги ажримига асосан сиртдан қамоққа олиш тарзидаги эҳтиёт чораси қўлланган. 19 август куни у Қирғизистонда ушланиб, 2024 йил 16 январь куни Ўзбекистонга олиб келинган. 2024 йил 19 январь куни Жиноят-процессуал кодексининг 221-моддаси тартибида ушланган.
Мазкур ҳолат юзасидан К.Қ.В. 2023 йил 18 август куни Жиноят кодексининг 167-моддаси 3-қисми “а” банди (жуда кўп миқдорда ўзлаштириш ёки растрата йўли билан талон-торож қилиш) билан сиртдан айбланувчи тариқасида ишга жалб қилинган.
2024 йил 20 январдаги суд ажримига кўра, унга нисбатан қамоққа олиш тарзидаги эҳтиёт чораси қўлланган.