Марказий банк: қўнғироққа жавоб бериш билан картадаги пуллар автоматик ечиб олинмайди
0
Маълум қилинишича, бугунги кунда мамлакатда фаолият олиб бораётган тижорат банклари ҳамда тўлов ташкилотлари мобил иловаларида фирибгарлик ҳолатларининг олдини олишга қаратилган хавфсизлик чоралари кўрилган.
Хусусан, фуқаро тижорат банки ёки тўлов ташкилоти мобил иловасидан фойдаланиш учун рўйхатдан ўтишда телефон рақамини кўрсатади ҳамда SMS хабар шаклида келган тасдиқлаш кодини киритади. Шунингдек, шахсини тасдиқлаш мақсадида қўшимча биометрик идентификациядан ўтиши лозим. Рўйхатдан муваффақиятли ўтган фуқаро мобил иловада ўзига тегишли банк картасини бириктириш имконига эга бўлади.
Шу билан бирга, мобил иловага банк картасини бириктириши учун банк картасига уланган телефон рақамига бир марталик тасдиқлаш коди (ОТР) юборилади. Ушбу ОТP код фуқаро томонидан мобил иловага тўғри киритилганидан кейингина унинг банк картаси иловага бириктирилади.
Бунда мобил иловада рўйхатдан ўтиш жараёнида киритилган телефон рақами ва банк картасига SMS хабарнома орқали уланган телефон рақам бир хил бўлиши лозим, акс ҳолда банк картасини иловага бириктириш рад этилади.
Бундан ташқари, тижорат банклари ва тўлов ташкилотлари мобил иловаларида янги рўйхатдан ўтган фойдаланувчиларга нисбатан иловага бириктирилган банк карталаридан фойдаланиш 1 соатгача чекланади.
“Бироқ фуқаро ўзининг мобил иловадаги аккаунтини бошқариш ҳуқуқини берувчи логин ва парол ҳамда телефон рақамига келган бир марталик ОТP кодни бегона шахсларга (фирибгарларга) бериб қўйса ёки мессенжерлар орқали тарқалаётган зарарли APК файлларни мобил қурилмага ўрнаца, унинг банк картасидан ноқонуний равишда пул ечиб олиниши мумкин!”, дейилади хабарда.
Марказий банк аҳоли ва тадбиркорлик субъектларини ижтимоий тармоқларда тарқалаётган тасдиқланмаган маълумотларга ишонмасликка чақирган.